行動

曬傷

隔左個星期再落區,明顯人流真係少到不得了,不過仍然有大把婦女公婆喺街市到出出入入,理你全城爆疫。小弟都係同其他人保持距離咁行,但遇到嘅菜檔呀魚檔呀咁就好難避,因為幾時都係咁多人,唯有兜路行啦。行番去後巷睇下啲街坊有冇戴口罩先,遠遠見到佢個口罩跌左落下巴,我就大聲提街坊戴番上去喎,佢自己醒水都扯番高佢。

街坊話呢排佢都唔敢行出去街到執紙皮,因為實在太熱,佢話未見個香港咁熱嘅,根本係唔想行出去,只係厘喺自己個檔等人掉啲紙皮俾佢。跟住佢伸隻手出嚟俾我睇:「拿你睇下,曬到唔剩係黑,仲曬到好似起晒紋起晒麟角咁呀。」我話呢啲係曬傷呀,我勸佢暫時唔好執住,又咁啱附近有幢大廈又俾番佢做清垃圾,有啲收入就唔好咁辛苦暴曬啦。咁街坊梗係聽左當聽唔倒啦,因為佢唔做又唔慣,咁我就駛出殺手鐧:「呀等我打俾你個女等佢勸下你唔好執先….」,佢聽到係佢個女即係眼神直望住我,老尷地笑住:「少啲囉少啲囉,唔好話俾佢聽呀,好煩呀佢成日叫我唔好執 …. 」

我同佢講阿女著緊你咁你咪聽下佢講少啲執囉,咁我問佢少係少成點先,佢話最多一個禮拜執三日啦,咁我就聽住先啦。轉頭就同佢買左啲冰袖手套同盧薈俾佢搽(好再我太太教我用如果唔係真係唔識),不過都唔知佢會唔會用,但兩隻手都曬傷得緊要,真係要停下休養下啲皮膚。

同街坊傾計時又有個記者搵我,話想搵啲拾荒者訪問下,睇下喺限聚令同禁止堂食嘅措施下要喺街到食,拾荒者係點嘅情況。不過最後係做唔到嘅,我解釋返俾個記者聽,事關有冇疫情,又或者有冇禁止堂食,拾荒者都係一個人開工,佢又唔會有兩三個人同佢喺條街到幫佢手,所以又唔會違反限聚令,你話佢食飯又點算呢?其實街坊不嬲都係一路推車推到攰肚餓咪買個飯盒坐喺架車到自己食自己,有冇禁止堂食佢都係日日都喺條街到自己食,都唔會有人理佢,又唔會有人約埋佢地喺街到一齊食,我喺到問番一個問題就係究竟訪問佢地嘅新聞價值喺邊,因為有冇呢啲措施都係弧伶伶一個人,跟住記者朋友:「係喎,原來佢地一直都係自己一個喺街到,弧伶伶仲慘。」

係呀,佢地就係一直都弧伶伶一個自己喺條街到囉,就係咁… 

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s